Dysgwyr a Siaradwyr Newydd

Creu cyfleoedd i ddysgwyr a siaradwyr newydd ymarfer a mwynhau’r Gymraeg

Rydym yn gweithio’n agos gyda Dysgu Cymraeg Sir Benfro i sicrhau bod dysgwyr a siaradwyr newydd yn teimlo’n rhan o’r gymuned, waeth faint o Gymraeg sydd ganddynt. Boed eich bod yn dechrau ar eich taith neu’n dymuno magu hyder i ddefnyddio mwy o Gymraeg, rydym yn creu cyfleoedd cefnogol a chyfeillgar lle gellir ymarfer yr iaith mewn awyrgylch hamddenol. Ein nod yw annog defnydd naturiol o’r Gymraeg gan wneud i bawb deimlo’n gyfforddus wrth ei defnyddio yn eu bywyd bob dydd.

Coffi a Chlonc

Pob mis, rydym yn cynnal sesiynau Coffi a Chlonc mewn sawl lleoliad ar draws y sir, gan gynnwys Arberth, Llandudoch, Abergwaun a Doc Penfro ac un ar lein. Mae’r sesiynau hyn wedi dod yn achlysur poblogaidd iawn, gyda llawer o bobl leol yn dod ynghyd i fwynhau paned, sgwrs a chwmni da.
Mae’r boreau coffi’n agored i bawb, siaradwyr rhug a dysgwyr sy’n dymuno defnyddio neu ddysgu mwy o’r iaith mewn awyrgylch gyfeillgar a hamddenol.

Os hoffech chi ymuno â’n sesiynau i gael paned a sgwrs neu i gwrdd â phobl newydd, cysylltwch â ni am fwy o wybodaeth.

Y Cwis Mawr

Y Cwis Mawr yw un o weithgareddau cenedlaethol Mentrau Iaith Cymru, lle mae timau ledled y wlad yn cystadlu mewn cwis Cymraeg hwyliog ac addysgiadol. Mae’r tîm buddugol yn cael y cyfle i gynrychioli’r ardal yn yr Eisteddfod Genedlaethol, gan ychwanegu at y cyffro a’r ysbryd cystadleuol. Rydym yn cydweithio’n agos iawn gyda Dysgu Cymraeg Sir Benfro i gynnal y cwis, gan sicrhau profiad cynhwysol a chroesawgar i ddysgwyr.

Gŵyl y Dysgwyr

Digwyddiad blynyddol yw Gŵyl y Dysgwyr a gynhelir ym Maenor Scolton ar y cyd â Dysgu Cymraeg Sir Benfro. Mae’r ŵyl yn cynnig amrywiaeth o weithgareddau rhyngweithiol, ac mae gweithgareddau’r gorffennol wedi cynnwys gwersi garddio, sesiynau celf creadigol, gemau iaith, canu, cyfleoedd i gymdeithasu a seremoni wobrwyo. Mae’r diwrnod bob amser yn llawn bwrlwm, gan ddod â dysgwyr at ei gilydd i fwynhau profiad ysbrydoledig, cefnogol a chroesawgar sy’n annog defnydd hyderus o’r Gymraeg.

Gŵyl Fach yr Hydref

Yn ogystal â’r Ŵyl yn yr haf cynhelir un llai ychydig ar ôl dechrau’r flwyddyn ddysgu. Mae hyn yn cynnig cyfle i ddysgwyr i gwrdd a chymdeithasu gyda dysgwyr eraill a chymryd rhan mewn gweithgareddau tymhorol trwy gyfrwng y Gymraeg. Gall gynnwys taith gerdded neu ymweliad gan siaradwr neu berfformiwr hefyd. Eto mae’n weithgaredd ar y cyd â Dysgu Cymraeg Sir Benfro ac mae’r lleoliad yn amrywio o flwyddyn i flwyddyn.

Cyfleoedd i Gymdeithasu

Gan weithio’n agos gyda Dysgu Cymraeg Sir Benfro, mae’r Fenter yn creu cyfleoedd i ddysgwyr gymdeithasu gyda dysgwyr eraill ar draws Sir Benfro. Mae hyn yn cynnwys dathlu’r Nadolig gyda chinio neu de prynhawn, taith gerdded a swper ar ddiwedd y flwyddyn ddysgu,a thrip haf i leoedd diddorol. Byddant hefyd yn ymuno mewn digwyddiadau cymunedol ar hyd y flwyddyn wrth gwrs, a mae llawer yn gwirfoddoli mewn gweithgareddau fel y Parêd Gŵyl Ddewi.